කොරෝනා සමග ජීවත් වෙන හැටි සරලව

හෙට සිට ජනරජය නැවත ක්‍රමයෙන් සාමාන්‍ය තත්ත්වයට පත් වෙනු ඇත. ඒ සඳහා ජනරජවැසියන් ලෙස අප විසින් කළ යුතු දේ මොනවාද?

 

කායික දුරස්ථනයට පුරුදු වෙන්න. පසුගිය මාසයක් පමණ ඔබ කළේ සමාජ දුරස්ථනය යි. එනම් සමාජ ආශ්‍රයෙන් වෙන් වී නිවසේ හුදකලාව වාසය කිරීමයි. කායික දුරස්ථනය යනු සමාජයේ සාමාන්‍ය කටයුතු කරන අතරම එකිනෙකාගෙන් තරමක් ඈත් වී අතේ දුරින් කටයුතු කිරීමයි. 

 

1) කලබලයක් නැතිව එදිනෙදා වැඩ කරන්න. කෑම බීම පෙට්‍රල් ඩීසල්  ආදිය මිලදී ගැනීම දැන් කඩිමුඩියේ කිරීමට අවශ්‍ය නැත. හදිස්සිකාරයන්ට ඉස්සර වෙන්න දී ඔබේ පාඩුවේ ඔබේ වැඩ ටික කර ගන්න. 

නිතර සබන් යොදා දෙඅත් සෝදා වියළිව තබා ගන්න. පිටස්තරයෙක් සමග ගනුදෙනු කිරීමෙන් පසු සනීපාරක්ෂක දියරයෙන් දෙඅත් පිරිසිදු කර ගන්න.

 

2) ඉවසීමෙන් රැකියා ව්‍යාපාර කරන්න. රැකියාවට වාර්තා කිරීමට උදේ 10.00 වන තෙක් දැන් කාලය තිබේ. වේලාසනින් නිවසින් පිටත් වී බස් නැවතුම්පොළට හෝ දුම්රිය ස්ථානයට යන්න. එක පොදියට පොර කාගෙන නගින අයට නගින්න දී ඔබ පැත්තකට වී ඉන්න. දුම්රියේ ඉඩ නැත්නම් බස් එක ගන්න. සෙනග පටවනවා නම් ඉන් බැස වෙන බසයක නගින්න.

අනෙක් අය සමග කතා නොකර තමන්ගෙ වැඩක් බලා ගෙන ගමන යන්න. පොතක් කියවන්න. පළාතටම විසිරෙන්න කහින්න කාරන්න කිඹුහුම් අරින්න කෙල ගහන්න එපා. මුඛ ආවරණයක් නැත්නම් අඩුම ගානේ ලේන්සුවකින් හෝ ඒ වෙලාවට ඔබේ මුව ආවරණය කර ගන්න. 

ආසනය මත කෑම පෙට්ටි ඇරගෙන කන්න එපා. ගෙදරින් එන්න කලින් උදේට කන්න. නැත්නම් කාර්යාලයට ගොස් කැන්ටිමෙන් කන්න. දෙතුන් දෙනා වටවෙලා එක පතේ කන්න එපා. පරක්කු වෙලා අවේලාවේ කන්න එපා. නිසි වෙලාවට නිසි ප්‍රමාණයට කෑම නොගැනීම ලෙඩ ගොඩකට මුල බව මතක තබා ගන්න.

 

3) සිහියෙන් වැඩ කරන්න. රැකියා ස්ථානයේ තමන්ගේ දෛනික වැඩ ටික සැලසුම් කර දක්ෂ ලෙස ඉක්මනට අවසන් කරන්න. සගයන් සමග තේ බිබී ඕපදූප කියමින් ලංව ඉන්න එපා. තමන්ගේ මේසෙට වෙලා තමන්ගෙ වැඩ ටික හොඳින් කර වේලාසනින් ගෙදර එන්න පිටත් වෙන්න. හිරු එළිය සහ වාතාශ්‍රය එන ලෙස රැකියා ස්ථානය පිරිසිදුව තබා ගන්න.

ගෙදර සිට තම වැඩ ටික කළ හැකි නම් ඔබේ ප්‍රධානයා සමග එකඟ වී සතියට දින කිහිපයක් හෝ එසේ කරන්න. ඔබ කොපමණ කාලයක් කොතැන සිට වැඩ කළාද යන්නට වඩා වැදගත් වන්නේ ඔබ කරන වැඩ ප්‍රමාණය සහ එහි ගුණාත්මක බවයි. ජනරජය මුහුණ දෙමින් සිටින ආර්ථික අභියෝගයට මුහුණ දීමට නම් ඔබ ඔබේ රාජකාරිය උපරිමයෙන් ඉටු කිරීම ඉතා වැදගත්ය.

 

4) සෙනග රැස්වන තැන්වලට යන්න එපා. ආපනශාලා, බාර්, සෙල්ලම් පිට්ටනි සහ සිනමාශාලා ආදියට යෑමෙන් හැකි තරම් වළකින්න. ඡන්ද අපේක්ෂකයන්ගේ රැස්වීම්වලට නම් යන්නම එපා. මේ කරුණු කිසිවක් තේරුම්ගත නොහැකි මෝඩයන් වැඩිපුරම එන්නේ එතැනටය. එවැනි රැස්වීම් සංවිධානය කරන මෝඩ අපේක්ෂකයන්ට ඔබේ පරමාධිපත්‍යය ඡන්දය පිරිනැමිය යුතු දැයි දෙවරක් සිතන්න.

 

5) වයස්ගත රෝගී අය පරෙස්සම් වෙන්න. ඔබේ පවුලේ අයෙකු වයස අවුරුදු 70 ට වැඩි සහ රෝගී හෝ දුබල අයෙක් නම් ඔහු/ඇයගේ සෞඛ්‍ය තත්ත්වය ගැන නිතර සොයා බලන්න. ඒ අයට සමාජ දුරස්ථනය සුදුසුය. ඔවුන් වෙනම කාමරයක තබා ආදරෙයන් රැක බලා ගන්න. ඔබ පිටත සිට ආ පසු හොඳින් පිරිසිදු වී මිස ඔවුන් සමීපයට නොයන්න.

 

6) ඔබේ පවුලේ ශරීර සෞඛ්‍යය හොඳින් පවත්වා ගන්න. ධාන්‍ය එළවළු පළතුරු ආහාරයට ගන්න. උණු වතුර බොන්න. සෙම් ගතිය වැඩි කරන සීතල කෑම බීම වලින් වළකින්න. රාත්‍රී කාලයේ නෑමෙන් වළකින්න. සාමාන්‍ය දැනීමෙන් දන්නා මෙවැනි ඇවතුම් පැවතුම් පිළිපදින්න. පළමුව ඔබ රැකෙන්න. එවිට සියල්ලෝ රැකෙනු ඇත.

ඔබට හෝ පවුලේ කිසිවෙකුට රෝග ලක්ෂණ තිබේ නම් හෝ රෝගය වැළඳී ඇතැයි සැක සිතේ නම් මෙන්න මේ පෞද්ගලික ස්වයං තක්සේරුව කර ගන්න. එහි දෙන උපදෙස් පිළිපදින්න. http://covid19.kpolom.com/

 

7) ගැටලුව විද්‍යාත්මකව තේරුම් ගන්න. මේ සියලු දේ කරන අතරතුර ඇතැම් විට රෝගීන් සංඛ්‍යාවේ වැඩි වීමක් ඇති විය හැකිය. එය ස්වාභාවිකය. නමුත් එය වැඩි වෙන අයුරින්ම නැවත අඩු වී යනු ඇත. ලෙඩ වෙන අතිශය බහුතරයක් සුවය ලබන බව මතක තබා ගන්න. කලබල නොවී තමාගේ වැඩ ටික හැකි පමණින් කරන්න. රෝගීන් වැඩිපුර වාර්තා වන ප්‍රදේශවලට යෑමෙන් වළකින්න. විනෝද චාරිකා කල් දමන්න.

 

8) අනවශ්‍ය වියදම් කපා හැර සරල දිවිපෙවතකට හුරුවෙන්න. අසල්වැසියන් සමග කියවමින් කල් මැරීම නවතා ස්වයං රැකියාවක් පටන් ගන්න. එළඹෙන්නේ ගෝලීය ආර්ථික අර්බුදයකි. එය වසර දෙකක් පමණ ඇදෙනු ඇත. අනෙකාගේ දේ කඩා වඩා ගෙන ව්‍යාපාර කරන ක්‍රමය අත් හරින්න. නිර්මාණශීලීව සමාජ සුබලපෑමක් ඇති කරන සාර්ථක සමාජ ව්‍යවසායකයෙක් වෙන්න.

 

9) ඊර්ෂ්‍යාව, වෛරය, ක්‍රෝධය, මෝහය වපුරන ජනමාධ්‍යය සහ සමාජ මාධ්‍යය වැඩසටහන් නැරඹීමෙන් වළකින්න. ඔබේ මනස හැකි තරම් පිරිසිදුව සහ තියුණුව තබා ගන්න. සත්‍ය තොරතුරු සහ දත්ත සොයා බලා ප්‍රඥාවෙන් විමසා තීරණ ගන්න. පවිටු මාධ්‍යකරුවන්ට, බේගල් ඇදබාන සාස්තරකරුවන්ට, අන්ධ විශ්වාස වපුරන පූජකයන්ට නොරැවටෙන්න. අසත්‍ය පුවත් සහ කටකතා ප්‍රචාරය කිරීමෙන් වළකින්න.

 

10) ඔබ අදහන ආගම ධර්මය අධ්‍යයනය කරන්න. එහි හැසිරෙන්න. ඔබට ඇති දේ ගැන සතුටු වන්න. ඔබේ පවුලේ අය සමග ආදරයෙන් කරුණාවෙන් අවබෝධයෙන් කල් ගෙවන්න. ඔබේ මිතුරන් සමග සමාජ මාධ්‍යය සහ දුරකථනය හරහා දුරස්ථව සම්බන්ධ වෙන්න. හැම මොහොතකම සතුටින් ඉන්න. වරකට එක දිනයක් බැගින් ජීවතයට මුහුණ දෙන්න. 

 

ජීවිතයේ අඳුරුතම පැයට ඇත්තේද මිනිත්තු 60 ක් පමණී.

 

ඔබේ හිතවත්
එරන්ද ගිනිගේ

Filed under
Sinhala
Previous Next

This site uses Akismet to reduce spam. Learn how your comment data is processed.

  1. W.M.D.Thannekumbura
    ස්තුතියි
    Reply
Menu
Eranda Ginige
Social Innovator, Writer, Speaker