එක ජාතියක් – බෙදුණු රටක් | විවිධ ජාති – එක රටක්

අපේ රටේ අනාගතය වෙනුවෙන් නිර්මාණය කළ යුතු අලුත් සංවර්ධනයේ එකම පදනම, අනිවාර්යය පරමාර්ථය සහ සදාකාලික සිද්ධාන්තය විය යුත්තේ “ශ්‍රී ලංකාව ලෙස හඳුන්වන මේ භූමිය සහ එහි ඇති සියලු ජීවී-අජීවී සම්පත්, අනාගතයේ උපදින සිංහල, දෙමළ, මුස්ලිම්, මැලේ, බර්ගර් දරුවන්ටත්, ඔවුන්ගේ දරුවන්ටත්, මතු මේ භූමියේ උපදින සියලු දරුවන්ටත් අද තිබෙනවාටත් වඩා හොඳින් ඉතිරි කර තැබීමයි”. වියත්මග 2018 සමුළුවේදී මා සිදු කළ එම ප්‍රකාශයේ සෑම වචනයක්ම ඉතා සැලකිල්ලෙන් තෝරා-බේරා ගෙන ලියා ඇත.

එහි සරල අදහස නම් අද ජිවත් වන අප විසින් මේ භූමියේ සම්පත් ඉවක්-බවක් නැතිව පරිභෝජනය කරමින් විනාශ නොකර, අනාගතයේ ජිවත් වන මිනිසුන්ටද ඒවා සාධාරණව පරිභෝජනය කිරීමේ හැකියාව සනාථ කිරීමයි. ඒවා ගැන එකින් එක ඉදිරි කාලයේදී විස්තර කරමි. නමුත් ඉහත ප්‍රකාශය තුලින් තවත් ගැඹුරු අදහසක් ජනිත කිරීමට මම උත්සාහ කරමි. එනම් අප රටේ ජිවත්වන මිනිසුන්ගේ ජාතික අනන්‍යතාවය පිලිබඳ ගැටලුව අනාගතයට ගැලපෙන ලෙස විසඳීමයි. මෙම ලිපිය එහි පූරණයයි.

භූමිය සහ භූමියේ නම

Sri Lankaමෙම භූමිය (land) හැඳින්වීමට අප දන්නා ඉතිහාසයේ පවා විවිධ නම් භාවිතා කර තිබේ. සිහලදිව, ලංකා, තැප්‍රෝබේන්, සෙරන්ඩිබ්, සිංහලේ, ඊලාම්, සිලෝන් වැනි විවිධ නාමයන් විවිධ අය විසින් විවිධ කාලවල භාවිතා කළ බවට සාක්ෂි ඇත. එකල ජීවත් වූ අදූරදර්ශී රදළයන් විසින් 1815 උඩරට ගිවිසුමෙන් බ්‍රිතාන්‍ය අධිරාජ්‍යයට අවසාන වශයෙන් පාවා දෙන්නේ “සිංහලේ” රටයි. උඩරට ගිවිසුම කියවීමෙන් එය තහවුරු වේ. ඉන් අනතුරුව වසර 133 ක් තිස්සේ අධිරාජ්‍යවාදී බ්‍රිතාන්‍යයන් මෙම භූමිය හඳුන්වන්නේ සිලෝන් (Ceylon) යනුවෙනි.

“ශ්‍රී ලංකාව” යනු වර්තමානයේ මෙම භූමිය හැඳින්වීමට භාවිතා කරන කෙටි නාමයයි. රාවණ පුරාවෘත්තයන්ට අනුව “ලංකාපුර” යනු රාවණ අධිරාජ්‍යයාගේ අගනගරයයි. ලංකා යන නම මේ භූමියට යෙදුනු සැටි විවාදාපන්න නමුත් එම නාමය අනාදිමත් කාලයක සිට භාවිතා වූ බවට සාක්ෂි තිබේ. එම නාමය මෙම භූමියට නැවත නිල වශයෙන් බැඳෙන්නේ 1972 දී සම්මත කරගත් ව්‍යවස්ථාව හරහාය. ඒ අනුව “ශ්‍රී ලංකා ප්‍රජාතාන්ත්‍රික සමාජවාදී ජනරජය” යනු අප රටේ වර්තමාන ව්‍යවස්ථාවස්ථාපිත නාමයයි.

එම ව්‍යවස්ථාව ලියූ අය “ශ්‍රී” යන්න ඉංග්‍රීසියෙන් ලියා ඇත්තේ “Sri” යනුවෙනි. එවිට එහි ඉංග්‍රීසි උච්චාරණය “ස්රී” විය යුතුය. ඇතැම් විදේශිකයන් “සිරි ලංකා” යනුවෙන් හඳුන්වන්නේ එම නිසා විය හැකිය. ඇතැම් පැරණි ආයතන තවමත් සිලෝන් යන නාමය භාවිතා කරති. ලංකා බැංකුවට ඉංග්‍රීසියෙන් කියන්නේ බෑන්ක් ඔෆ් සිලෝන් කියාය. ලංකා ඛනිජ තෙල් නීතිගත සංස්ථාව ඉංග්‍රීසියෙන් ලියන්නේ සිලෝන් පෙට්‍රෝලියම් කෝපරේෂන් යනුවෙනි.

දෙමළ බසින් මේ භූමිය බොහෝ විට හඳුන්වන්නේ “ඉලංගෛ” යනුවෙනි. ඇමරිකානුවන් සහ ඇමරිකාවේ වසර කිහිපයක් ජිවත් වූ මේ භූමියේ උපන් මිනිසුන් කියන්නේ “ශ්‍රී-ලෑන්ක” යනුවෙනි. සමාජ මාධ්‍ය වල කොටන්නේ #lka යනුවෙනි. මා කියන්නට උත්සාහ දරන්නේ මෙම භූමියට හෝ කවර භූමියකට හෝ භාවිතා කරන නාමය සංගත හෝ සදාකාලික හෝ නොමැති බවයි. අතීතයේ සිදු වූවා සේම අනාගතයේදීද එය වෙනස් විය හැකිය.

ජාතිය, ජාතිය සහ ජාතිය

Peopleජාතිය යන සිංහල යෙදුම ජාතිය, ජනවර්ගය සහ ජාතිකත්වය වැනි සංකල්ප වලට පොදුවේ භාවිතා වේ. ඒවා ගැන පිටු ගණන් ලිවීමට හැකි වුවත් මෙම ලිපියේ අරමුණ එය නොවේ. ජාතිය (Race) යනු ඉතා සංකීර්ණ, අතිශය විවාදාත්මක, ජීව විද්‍යාත්මක සහ සමාජ විද්‍යාත්මක වර්ගීකරණයක් ලෙසද; ජනවර්ගය (Ethnicity) යනු මානව-සමාජ-ආගමික-සංස්කෘතික-ඓතිහාසික වර්ගීකරණයක් ලෙසද; ජාතිකත්වය (Nationality) යනු රාජ්‍ය-නෛතික වර්ගීකරණයක් ලෙසද සරලව පැහැදිලි කළ හැකිය. නමුත් “ජාතිය” යන වචනය එහි “ඉපදීම” යන මුල් අර්ථයෙන්ද, එහි “වර්ග” යන බාල අර්ථයෙන්ද සංයෝග වී “කෙනෙකුගේ ඉපදීම මත කෙරෙන වර්ගීකරණය” යන නූතන අර්ථයෙන් ඉහත සියලු සංකල්ප වලට පොදුවේ භාවිතා වේ.

අපේ රටේ ඉපදී, සංක්‍රමණය වී, මැරී යන සිංහල, දෙමළ, මුස්ලිම්, මැලේ, බර්ගර් සහ අනෙකුත් විවිධ ජාතීන්ට අයත් මිනිසුන් අතර ජානදර්ශක (genotype) සහ රූපදර්ශක (phenotype) වෙනස්කම් සොයා බැලීම, විද්‍යාත්මක පර්යේෂණයක් ලෙස සුන්දර වුවත්; රටේ පවතින ජාතික අනන්‍යතාවය පිලිබඳ ගැටලුවට එමගින් විසඳුමක් සොයා ගත නොහැකි බව ජාන විද්‍යාව පිලිබඳ උපාධියක් හිමි මගේ විශ්වාසයයි.

“ජාතිය” යන නූතන භාවිතය වඩාත්ම ගැලපෙන්නේ ජනවර්ගය (ethnicity) යන සංකල්පයටයි. එනම් ඔවුන්ටම අනන්‍ය වූ මානව-ඓතිහාසික-සමාජ-ආගමික-සංස්කෘතික ලක්ෂණ පෙන්වන ජනගහණයකි. ලියන-කියන භාෂාව, පුද්ගල සහ සමාජ සාරධර්ම, ආගමික විශ්වාස සහ ඇදහිලි, සම්ප්‍රදායික චාරිත්‍ර-වාරිත්‍ර, ආහාර-පාන, විලාසිතා, ක්‍රීඩා, සංගීතය, නර්තන, උත්සව ආදියෙන් සමාන චර්යා රටාවන් (හැසිරීම්) පෙන්වන සහ ඒවාට බලපවත්වන සමාන සිතුවිලි ඇති මිනිසුන් එක ජනවර්ගයක් ලෙස හඳුනාගත හැකිය.

එයට ජිව විද්‍යාත්මක පදනමක් තිබීමට හෝ නොතිබීමට පිළිවන. නමුත් එම ලක්ෂණ ව්‍යාප්තියට බලපාන ප්‍රධානතම සාධකය එම ජනවර්ගයේ එකෙක්ව “ඉපදීම” සහ ඒවා පරම්පරාවෙන්-පරම්පරාවට උරුම වීම නිසා “ජාතිය” යන යෙදුමේ වරදක් නොමැත.

ඇති ජාති සහ නැති ජාති

Race, Ethnicity, Nationality, Identityවිද්‍යාත්මක හේතු නිසා හෝ දාර්ශනික හේතු නිසා ජාතිය කියා දෙයක් නැතැයි කීම බොළඳ කමකි. සිංහල ජාතිය ලෙස පැහැදිලිව හඳුනාගත හැකි ජනගහණයක් මෙරට ඇත. දෙමළ ජාතිය ලෙස පැහැදිලිව හඳුනාගත හැකි ජනගහණයක් ඇත. මුස්ලිම් ජාතිය ලෙස පැහැදිලිව හඳුනාගත හැකි ජනගහණයක් ඇත. මැලේ සහ බර්ගර් ජාතීන් සංඛ්‍යාත්මකව සුළු වශයෙන් හෝ පැහැදිලිව හඳුනාගත හැකිය.

ඒ ඔවුන්ට අනන්‍ය වූ මානව-ඓතිහාසික-සමාජ-ආගමික-සංස්කෘතික දර්ශක පැහැදිලිව තිබෙන නිසාය. ඒවා අතීතයේ සිට විකාශය වූ, වෙනස් වෙමින් පවතින, අනාගතයේදී තවත් පරිණාමය වන සංකීර්ණ දර්ශකයන්ය. යම් ජාතියක මිනිසුන් සිය අනන්‍යතාවය ලෙස අත්විඳින්නේත්, අන්‍යයන්ට ප්‍රකාශ කරන්නෙත් ඒවාය. එම ජාතික අනන්‍යතාවයන් නොපිළිගන්නා පුද්ගලයා යථාර්තය නොදකින මෝඩයෙකි; නැතිනම් ශූන්‍යවාදියෙකි; නැතිනම් යටි අරමුණක් ඇති කපටියෙකි.

ඒ වෙනුවට එකම ශ්‍රී ලාංකේය (හෝ ලාංකීය හෝ ලාංකික හෝ) ජාතියක් (Sri Lankan Race, Ethnicity or Nation) ලෙස ජිවත් විය යුතු යැයි කීම ආන්තික අමන කමකි. “ශ්‍රී ලාංකේය ජාතිය” ලෙස වෙන් කර හඳුනාගත හැකි ඔවුන්ටම අනන්‍ය වූ මානව-ඓතිහාසික-සමාජ-ආගමික-සංස්කෘතික දර්ශක පෙන්වන ජනගහණයක් මෙරට තබා ලොව කිසිම තැනක නොමැත.

අප රටේ ජිවත් වන සිංහල, දෙමළ, මුස්ලිම්, මැලේ, බර්ගර් ජාති වල මිනිසුන්; නොපවතින, අස්වාභාවික, කෘත්‍රිම ශ්‍රී ලාංකේය ජාතියකට බලහත්කාරයෙන් නතු කිරීම ඒ මිනිසුන්ගේ මානව-ඓතිහාසික-සමාජ-ආගමික-සංස්කෘතික අයතීන් උල්ලංඝනය කිරීමකි. එය සැබැවින්ම සියුම් ජාතික සංහාරයකි. 21 වන සියවසේ ශ්‍රී ලංකාවේ ජාතික ගැටලුව ඇත්තේ එතැනය.

ජාතික-රාජ්‍යය සහ ජන-රාජ්‍යය පරස්පරය

ලොව ඇතැම් රටවල් “ජාතික-රාජ්‍යයන්” (Nation-state), එනම් අතිශය බහුතර එක ජාතියක මිනිසුන් විසින් පිහිටුවා ගත් රාජ්‍යයන්ය. ජර්මනිය, ඊජිප්තුව, බංග්ලාදේශය ඇතුළු බොහෝ රාජ්‍යයන් ජාතික-රාජ්‍යයන්ය. එනම් එම රටවල ජිවත් වූ බහුතරයක් එකම “ජාතියේ” මිනිසුන් විසින් එම රාජ්‍යයන් නිර්මාණය කරගෙන තිබේ.

1815 වන තෙක් මෙම භූමියේ තිබුනේ ජාතික-රාජ්‍යයක් විය යුතුය. සිංහල ජාතියේ මිනිසුන් අතිශය බහුතරයක් විසින් පිළිගත් සිංහලේ රාජාණ්ඩුව එතැනින් අවසන් වී, ඉනික්බිති වසර 133 ක් තිස්සේ ඉංග්‍රීසි අධිරාජ්‍යයේ සිලෝන් යන කොලනිය නමින් පැවතිණි. 1948 දී අපට නැවත ලැබෙන්නේ අර මුල් “සිංහලේ” නමැති ජාතික-රාජ්‍යය නොවේ. ඉංග්‍රීසින් සහ එකල දේශපාලන නායකයන් විසින් ගත් එම තීන්දුවේ සාධාරණත්වය ගැන වාද කිරීමෙන් දැන් ඵලක් නොමැත.

නිදහස් සටනේ සිංහල මිනිසුන් මෙන්ම, දෙමළ, මුස්ලිම්, මැලේ, බර්ගර් ජාතිවල මිනිසුන්ද අඩු වැඩි වශයෙන් සිටියෝය; මළෝය. එකල තුබූ දේශීය සහ ගෝලීය වාතාවරණය වෙනස්ය; සංකීර්ණය. 1972 දී පූර්ණ නිදහස ලබාගන්නේ අලුත්ම “ජනරජයක්” හෙවත් ජනතා-රාජ්‍යයක් හෙවත් ජනතාවගේ රාජ්‍යයකි. එය මා දකින්නේ  මේ භූමියේ මිනිසුන්ගේ ශිෂ්ඨාචාරය තැබූ තවත් ශ්‍රෙෂ්ඨ පියවරක් ලෙසයි.

නමුත් එය තව දුරටත් “එක ජාතියකරාජ්‍යයක් නොවේ. එය සැබැවින්ම මෙරට උපදින සිංහල, දෙමළ, මුස්ලිම්, මැලේ, බර්ගර් සියලුම ජාතිවල මිනිසුන්ට එක හා සමාන ලෙස අයිති රාජ්‍යයක් විනා ශ්‍රී ලාංකේය නම් අස්වාභාවික, අහේතුක, කෘත්‍රිම ජාතියකට අයත් රටක් නොවේ.

වෙනස් ජාතීන්ට සමාන අයිතිවාසිකම්

Equal Rightඑම නිසා අප එක ශ්‍රී ලාංකික ජාතියක් ඇති රටක් ලෙස හැඳින්වීම ඉතා වැරදි සහගතය. රටේ නම වෙනස් වන සෑම විටම එතෙක් පැවති ජාතික අනන්‍යතාවයන්ද වෙනස් කළ නොහැකිය. එය රාජ්‍ය භාෂාව සිංහල කිරීමටත් වඩා දරුණු වරදකි. ජාතීන් අතර අසමගිය ඇතිවන්නේ ඔවුන්ගේ ජාතියට එනම් ඔවුන්ගේ “අනන්‍යතාවය” අභියෝගයට ලක් වූ විටය. භාෂාව මත පිපිරුණු 30 වසරක යුද්ධයට මූල බීජය “අනන්‍යතාවයයි”. ශ්‍රී ලංකා ජනරජයේ සිංහල, දෙමළ, මුස්ලිම්, මැලේ, බර්ගර් වැනි වෙනස් ජාති වල මිනිසුන් සමාන අයිතිවාසිකම් ඇතිව ජිවත් වේ.

ඔබ කැමති සිංහල ජාතික අනන්‍යතාවයට නම් ඒ සඳහා ඔබට පුර්ණ නිදහස හිමිය. ඔබ කැමති දෙමළ ජාතික අනන්‍යතාවයට නම් ඒ සඳහා ඔබට පුර්ණ නිදහස හිමිය. ඔබ කැමති මුස්ලිම් ජාතික අනන්‍යතාවයට නම් ඒ සඳහා ඔබට පුර්ණ නිදහස හිමිය. ඔබ කැමති මැලේ ජාතික අනන්‍යතාවයට නම් ඒ සඳහා ඔබට පුර්ණ නිදහස හිමිය. ඔබ කැමති බර්ගර් ජාතික අනන්‍යතාවයට නම් ඒ සඳහා ඔබට පුර්ණ නිදහස හිමිය. ඔබ ජාතික අනන්‍යතාවයකට අකමැති අයෙක් නම් ඒ සඳහාද ඔබට පුර්ණ නිදහස හිමිය.

වෙනත් ඕනෑම ජාතියක මිනිසෙකුටද නීත්‍යානුකූලව මෙරට රටවැසිභාවය ලබාගෙන තමන් කැමති ජාතික අනන්‍යතාවයක් අනුව ජිවත් වීමට නිදහස හිමිය. ජනතා පරාධිපත්‍ය ඇති රටක උපන් ස්වාධීන මිනිසුන්ට යම් ජාතියක් බලෙන් පැටවීමට ආණ්ඩුවකට නොහැක. එසේ බල කරන ජනතා නියෝජිතයන් අප විසින් එක හෙලා ප්‍රතික්ෂේප කළ යුතුය. මෙම වැදගත් ප්‍රස්තුතය ව්‍යවස්ථාපිත කිරීම සඳහා රජයේ අවධානය වහ-වහා යොමු විය යුතුය.

මෙහිදී බොහෝ අයට මතුවන ප්‍රයෝගික ගැටලුවක් නම් දේශීය සහ විදේශීය, මුද්‍රිත සහ ඩිජිටල් ලිපි-ලේඛන සහ අයදුම්පත් වල එන Nationality යන්නට භාවිතා කරන්නේ කුමක්ද යන පැනයයි. අප ජාතික-රාජ්‍යයක් (Nation-state) නොවන නිසා Sri Lankan ලෙස ලිවීම වැරදි සහගත බව මගේ විශ්වාසයයි. අප ලිවිය යුත්තේ සිංහල (Sinhala), දෙමළ (Tamil), මුස්ලිම් (Muslim), මැලේ (Malay), බර්ගර් (Burgher), බ්‍රිතාන්‍ය (British), ඇමෙරිකානු (American), ඉන්දියානු (Indian) හෝ “ජාතියක් නොමැත” (None) යැයි මම යෝජනා කරමි.

ඒ අනුව “ජාතික ධජය” (National Flag) වෙනුවට “රාජ්‍ය ධජය” (State Flag) සහ “ජාතික ගීතය” (National Song) වෙනුවට “රාජ්‍ය ගීතය” (State Song) යන වචන වඩාත් යෝග්‍ය වේ. එමගින් එම තාවකාලික රාජ්‍ය “සංකේත” කෙරෙහි ජාතීන් අතර පවත්නා ගැටීම දුරු කළ හැකිය. “ජාතික” යන වචනය මුලට යෙදෙන ආයතන, ඒ වෙනුවට “රාජ්‍ය” යන වචනයට වෙනස් විය යුතුය. මෙහිදී පටලවා ගත යුතු නොවන්නේ රටවැසිභාවය හෙවත් පුරවැසිභාවය (citizenship) රටේ නම අනුවම එනම් ශ්‍රී ලාංකික (Sri Lankan) ලෙස ලිවිය යුතු බවය. එය හුදු නෛතික අවශ්‍යතාවයක් වන අතර ඇතැම් අය රටවැසිභාවය නීත්‍යනුකූලව වෙනස් කර ගන්නා අවස්ථා කොතෙකුත් ඇත.

අනාගතයේ දරුවෝ

Unity in Diversityවෙනස් සහ විවිධ ජාතීන්, සමාන අයිතිවාසිකම් සහිතව ජිවත් වන රටක ඇත්තේ ඉතා පරිණත සමාජයකි. එවැනි රටක ජාතීන් අතර තරඟකාරීත්වය ක්‍රමයෙන් නැති වී යනු ඇත. තමාගේ ජාතික අනන්‍යතාවයට කිසිදු අභියෝගයක් නැතිනම්, එනම් තම ජාතියත් අනෙක් ජාතින් හා සමාන ලෙස ස්වභාවයෙන්ම සලකනවා නම් තරඟයක් කුමටද? එවිට අමුතු කුහක දේශපාලනික සංහිඳියාවන් අවශ්‍ය  වන්නේද නැත.

මෙරට වයස්ගත ජාතිවාදී දේශපාලන චරිත ඉදිරි වසර 10-20 තුළ මිය යාමත් සමග “ශ්‍රී ලංකා ප්‍රජාතාන්ත්‍රික සමාජවාදී ජනරජයේ” ස්වර්ණමය යුගය උදා වනු ඇත. ඒ අනාගතයේ සිංහල, දෙමළ, මුස්ලිම්, මැලේ, බර්ගර් දරුවන් තමාගේ ජාතික අනන්‍යතාවය මෙන්ම අනෙකාගේ ජාතික අනන්‍යතාවයද ආරක්ෂා කරනු ඇත. එවිට ජාතික බැම්මෙන් එහාට ගිය පරිණත, උසස්, දියුණු ජනතාපාලන ක්‍රමයක් බිහි වෙනු ඇත.

මල් වත්තක් ලස්සන වන්නේ සියලු මල් වර්ග එක හා සමාන වූ විට නොවේ. විවිධ වර්ණවල මලින් පිරී ගැවසී ගත් විටයි. විවිධ ජාතීන් අතර සහ-සබඳතාවෙන් අලුත් කලා නිර්මාණ, උසස් සාහිත්‍ය කෘති, ගෘහ නිර්මාණ, නගර නිර්මාණ, ඉංජිනේරු විස්මයන් බිහි වනු ඇත. එකිනෙකා කෙරෙහි විශ්වාසයෙන්, ගෞරවයෙන් සහ ඉවසීමෙන් කටයුතු කරන ස්ථිර සහ සාරවත් එක රටක් බිහි වෙනු ඇත. ඒ පුනරුදය බිහි කිරීම අද ජිවත් වන අපගේ යුතුකමයි.

ඔබේ අදහස් පහතින් ලියන්න.

(Icons by Flaticon and Freepik)

Filed under
Sinhala
Previous Next

This site uses Akismet to reduce spam. Learn how your comment data is processed.

  1. Thilan Sanjeewa Perera
    Thanks for knowledge transfer.
    Reply
  2. ප්‍රියදර්ශිකා නවරත්න
    මෙය ටිකක් වැට උඩ වගේ
    Reply
    • ප්‍රියදර්ශිකා නවරත්න
      මෙය ටිකක් වැට උඩ වගේ ඔබේ අර වීඩියෝ එකත් එක්ක බැලුවාම. මුලදි තේරුණ හැටි ඔබව අගේ කලා
      Reply
  3. […] the Sinhala, Tamil, Muslim, Malay and Burgher all people must never forget the terrorism of the 20th century Sri Lanka. As long as we remember […]
    Reply
  4. […] […]
    Reply
  5. ප්‍රියදර්ශිකා නවරුවන්
    ඉතාමත් අගෙයි. ඔබට දැනෙන්නෙත් සැබෑ සිංහල බෞද්ධ ජාතිකත්වයමයි. කොහෙත්ම ඕන නෑ අමුතු ශ්‍රී ලාංකික ජාතියක්. මහඇදුරු නලින් ද සිල්වා මහතාත් නිතරම පෙන්වා දෙන සිංහල බෞද්ධ සංස්කෘතියට අනුගත විය හැකි සිංහල ජාතියත් අනෙක් වර්ගත් රුවන්වැලිසෑය ඉදිරිපිට සිට හමන සුළඟත් වැළඳ ගෙන මේ මගේ මාතෘභූමියයි කියා දකින්න හැකිනම් ඒ හැමෝම මේ රටේ අයිතිකරුවන්මයි. ඔබට ජයවේවා
    Reply
Menu
Eranda Ginige
Social Innovator, Writer, Speaker